Ukuu wa Moyo
Wanadamu wanapojenga minara ya kuadhimisha mafanikio yao, huwafanya watu wengine wajione wadogo. Watu wanaposimama mbele ya majengo hayo, hujihisi kuwa wadogo sana.
Hulazimika kuinua macho yao ili kuyaona, na kwa kujilinganisha nayo, hujihisi kuwa wadogo mno.
Huo ndio huitwa "ukuu".
Katika uumbaji wa moyo wako, ukuu huo una uwiano na wewe. Ndani yako kuna ukuu unaopaswa kukustaajabisha. Ni wewe mwenyewe, uliye hai, unayepaswa kustajabiwa. Hiki ndicho chombo ambacho upendo hutoka ndani yake.
Amani haitadhihirika kwenye ukuta fulani. Amani itadhihirika ndani yetu. Hapo ndipo tunapoihitaji zaidi. Ni ukosefu wa amani ya ndani unaosababisha vita vinavyotokea nje yetu. Amani inapodhihirika ndani yetu, ndipo tunapoanza kuelewa maana ya amani.
Amani lazima ihisiwe.
Furaha lazima ihisiwe.
Ukweli haupatikani katika maneno.
Ukweli ni hisia.
Ukweli mkuu uko ndani yetu, na uhalisia mkuu unajidhihirisha mbele ya macho yetu.
Tuko hapa. Huo ndio ukweli. Tupo. Tunaweza kuhisi. Tunaweza kuelewa. Tunaweza kupata utimilifu.
Uhai tulio nao unapaswa kuwa dhahiri kwetu. Si jambo tunaloweza kulifanya pembeni tu. Uangavu nao unapaswa kuwa dhahiri kwetu, si kwa watu wachache tu waliopewa jukumu la "kuwa na uangavu."
Nasema, simama kwa miguu yako mwenyewe.
Watu husema kwamba mimi ni "mwenye kuzua mabishano." Najua maana yake, lakini kwa udadisi niliitafuta kwenye kamusi ili kuona maana yake rasmi.
Kimsingi, maana yake ni mtu anayetembea upande mwingine.
Ninaelekea upande mwingine, lakini si kwa sababu tu ya kutembea kinyume na umati. Siwezi kufanya mambo kwa pupa katika maisha haya. Kila pumzi ni ya thamani mno. Kila wakati katika maisha haya ni wa thamani mno. Siwezi kujihatarisha. Ninahitaji kutembea katika mwelekeo ninaoujua, nikiwa na uangavu, si utata.
Ninajuaje? Nina dira, na naiita moyo.
Ni dira ya ajabu. Ni sahihi kabisa, na ni halisi. Inatuonyesha mwelekeo wa uhai. Watu huuliza kama ninazungumzia kusikia sauti kutoka ndani. Hapana, moyo haukuambii ununue gari la aina gani.
Moyo ni kilio kile cha ndani, mwito ule unaosema, "Pata utimilifu. Tosheleza kiu hii. Ishi maisha haya kwa ufahamu. Pata yote uwezayo kutokana na yale ambayo pumzi hii imekuletea. Uwe hai. Uwepo."
Baadhi yetu tumekuwa hodari katika kile kinachoitwa "ugonjwa wa mbuni." Tunachimba shimo, tunazika vichwa vyetu ndani yake, na kufikiri kwamba matatizo yatatoweka. Huo si uhai. Kuishi ni kuhisi furaha ya kuwa hai, ikitoka ndani yetu na kujidhihirisha kwa nje.
Ninachozungumzia ni kila mmoja wetu kuwa na amani. Hilo ndilo jambo la kwanza. Hakuna kinachoweza kuchukua nafasi yake. Tunahitaji kuwa na amani katika maisha yetu. Haya si maneno matupu. Hili ni jambo halisi. Uwezekano huu ni halisi kabisa.
Uache moyo wako uwe mwamuzi. Uko umbali gani kutoka kwako? Uko ndani ya kila mmoja wetu. Hivyo ndivyo ulivyo karibu. Mwishowe, kile ambacho sote tunakitafuta kiko ndani yetu.
